1955-1960 yillarda, institut endigina tashkil topgan davrda ilmiy-pedagogik kadrlar etishmas edi. SHuning uchun Toshkentdan yosh, istiqbolli olimlar ishga jalb qilindi. Professor va dotsentlar N.P.Sokolov, YU.V.Kolos, K.A.Zufarov, I.G.Mardershteyn, G.F.Korotko, H.Q.Salohitdinov, N.I.Pasternak kabi olimlar institutning to`laqonli faoliyat ko`rsatishi yo`lida fidokorona mehnat qildilar. Ular rahbarligida ko`plab fan nomzodlari va doktorlari tayyorlandi.
       Institutning ilmiy va pedagogik salohiyati asta-sekin oshib bordi. O`z ish faoliyati davomida doktorlik dissertatsiyasini yoqlab, keyinchalik mashhur jarroh darajasiga etgan I.YU.Ibodov, O.X.Xolmatov, S.U.Jumaboev, taniqli akusher-ginekolog S.A.Adintsova kabi olimlar o`nlab shogirdlar tayyorladilar.
       O`rta Osiyoda "Ovqat xazm qilish tizimi organlari fiziologiyasi" sohasida maktab yaratib, Andijon olimlarining nomlarini xorijga tanitgan olim G.F.Korotko rahbarligida 40 dan ziyod fan nomzodi, o`nlab fan doktori etishib chiqdi. Keyinchalik ularning o`zlari ham ko`plab shogirdlar tayyorladilar.
       Mustaqillik yillari, ayniqsa, institut olimlari uchun ravnaq topish yillari bo`ldi. SHu kunlarda institutda 60 ga yaqin fan doktori va professorlar, 200 ga yaqin fan nomzodi va dotsentlar faoliyat ko`rsatmoqdalar.
       O`zbekistonda Respublika limfologiya markazining tashkil topishi va uning keyingi faoliyati professor S.U.Jumaboev nomi bilan bog`liqdir. S.U.Jumaboev limfa tizimi fiziologiyasi, patologiyasi va unga bog`liq kasalliklarning paydo bo`lishi va rivojlanish mexanizmi, turli vositalar bilan limfa tomirlari va tugunlari orqali patologik jarayonga ta'sir etish kabi yangi davolash uslublarini yaratishdek original izlanishlari bilan bu tizim haqidagi yangi ma'lumotlarni dunyoga yoydi. Markazga uning asoschisi S.U.Jumaboev nomi berildi. Limfologlar maktabi tashkil topib, unda o`nlab shogirdlar etishib chiqdi. Birinchi marta xorijiy olimlar bilan hamkorlik tiklandi. Angliyaning Manchester Universiteti professori Ali Novvozxon bilan birgalikda limfologiyaning asosiy muammolariga bag`ishlangan monografiya ingliz tilida ilk bor chop etildi. Bu limfologiya sohasi bo`yicha S.U.Jumaboev rahbarligida uning shogirdlari tomonidan ilgari surilgan ishlar natijasida olingan yangi ma'lumotlarni jahonda e'tirof etilishining dalolatidir.
       Respublikada neyrojarrohlik, ayniqsa, umurtqa kasalliklari muammolarini xal etishdagi murakkab masalalar ustida professor N.M.Qurbonov boshchiligida olimlar izchil ish olib bordilar.
       Institutda "Respublika vertebrologiya markazi" tashkil topdi. Unga iqtidorli olim N.M.Qurbonov asos soldi. Hozirgi kunda bu markaz Farg`ona vodiysi viloyatlari aholisini umurtqa pog`onasi kasalliklaridan xorij etish yo`lida o`z faoliyatini davom ettirmoqda.
       Institut rahbariyati tashabbusi bilan "Respublika girudologiya markazi" tashkil etilgan bo`lib, shu kunlarda ko`plab tibbiy zuluklar yaratish va ko`paytirish yo`lga qo`yilgan. Markaz faoliyati tufayli zuluk bilan davolash mumkin bo`lgan kasalliklarning turi ko`paydi.
       Professor S.YU.Tursunov rahbarligida institutda kardiologlar maktabi yaratildi. Moskvadagi sobiq Butunittifoq kardiologiya ilmiy markazining taniqli olimlari qo`lida tarbiya olgan va tibbiy kardiologiyaning dolzarb masalalari bo`yicha ilmiy tadqiqotlar yaratgan iqtidorli olimlar endilikda o`zlari ham ko`plab shogirdlar etishtirmoqdalar. Ular hozirgi kunda O`zbekistonda yurak-ishemik kasalliklari, arterial gipertenziyalar, surunkali noinfektsion kasalliklarning epidemiologiyasi, davolashning yangi usullari profilaktikasiga yo`naltirilgan dolzarb muammolar bo`yicha ilmiy ishlarni amalga oshirmoqdalar. YUrak ishemik kasalliklariga olib keluvchi ma'lum xavfli omillar qatoriga genetik pestitsidlar, giperurkemiya tizimi, gemostazi va mikrotsirkulyator o`zgarishlar kabi omillarning birinchi marotaba kiritilishi institut olimlarining nomi bilan bog`liqdir.
       YUrak ishemik kasalligi, arterial gipertenziyalar va ularning qalqonsimon bezi funktsiyasining turli o`zgarishlari bilan birgalikda kechishida va boshqa patologik xolatlarda simpoto-adremal tizimdagi, katexolaminlardagi miqdoriy o`zgarishlar mexanizmini va ularning tahlili asosida amaliyotga yangi davolash uslublarini tavsiya etish institutda olib borilayotgan ilmiy-tadqiqotlarning e'tiborga loyiq va perspektiv yo`nalishi bo`lib qoldi.
       Institutda amalga oshirilayotgan ilmiy-tadqiqot ishlari tibbiyotning shu kundagi dolzarb muammolarini o`z qamroviga olishiga katta e'tibor berildi.
       Akusher-ginekolog va pediatr olimlar onalar va bolalar sog`lig`ini muhofaza qilish, xavfsiz onalik va sog`lom bolalikni ta'minlashga yo`naltirilgan ilmiy izlanishlarni muntazam ravishda olib bordilar. Natijada ekstragenital va boshqa ayollar va bolalar xastaliklarini kamaytirishga erishildi.
       Jarrohlik kasalliklarini tashxis etish va davolashning yangi usullarini yaratish, ilg`or texnologiyalarni jarrohlik tashxisida qo`llashga bag`ishlangan ilmiy-tadqiqotlar natijasida amaliyotga ko`plab yangiliklar tatbiq etildi. Bu dolzarb masalalar yuzasidan olib borilgan ilmiy-tadqiqotlarning yakuniy natijasi sifatida iqtidorli yosh xodimlar tomonidan ko`plab nomzodlik va doktorlik dissertatsiyalari himoya qilindi.
       Institutda olib borilgan antropometrik tekshirishlarga asoslangan ilmiy ishlar natijasida bosh miya yarim sharlarining turli maydonlaridagi yoshga bog`liq o`zgarishlar aniqlandi va bular yangi ma'lumotlar sifatida anatomiya fani xazinasini boyitdi. Bu sohada ko`plab institut yoshlari hamda qo`shni Qirg`iziston Respublikasi vakillari nomzodlik va doktorlik dissertatsiyalarini himoya qildilar.
       Mustaqillik yillarida institutda yangi dorivor moddalarni yaratishga qaratilgan ilmiy tadqiqotlarni bajarishga katta ahamiyat berildi.
       Institutda faoliyat ko`rsatib kelayotgan markaziy ilmiy-tekshirish laboratoriyasi keyingi yillarda yanada rivojlandi. Oshqozon-ichak, oshqozon osti bezining fermentlarini aniqlashning yangi usullari joriy qilindi.
       Gidrolitik fermentlar ajralishining turli ichki muxit va tashqi ta'sirotlar natijasida o`zgarish sabablari va ularni boshqarish mexanizmlarini o`rganishga bag`ishlangan tadqiqotlar natijasida o`nlab doktorlik va nomzodlik dissertatsiyalari himoya qilindi.
       Toshkent Immunologiya ilmiy-tekshirish instituti ilmiy kengashi va O`zbekiston Respublikasi FA Prezidenti qarori bilan institutda immunologiya laboratoriyasi tashkil qilinib, zamon talablari asosida jihozlandi va ishga tushirildi.
       Ilmiy-tadqiqotlar olib borishda nisbatan yangi yo`nalish bo`lgan immunologik tekshirishlarning yo`lga qo`yilishi bu sohada ham ko`plab dissertatsiya ishlarini rejalashtirish va bajarish imkonini berdi.

Bo'lim jamoasi