Andijon Davlat tibbiyot instituti klinikasi Andijon shahrining ko`p tarmoqli ulkan davolash muassasasidir. Klinika asoschisi YU.O.Otabekovning ta'rificha, chinakam "Salomatlik qasri"dir. Institut uchun alohida klinika qurish g`oyasi U.O.Olimov tomonidan tug`ilgan bo`lib, uning harakati bilan Xalq deputatlari Andijon shahar ijroiya qo`mitasining 1961 yil 10 maydagi 228/14-a sonli qaroriga binoan dastlab 750 o`rinli shifoxona qurilishi uchun 12,82 gektar er maydoni ajratib berilgan.
       O`zbekiston Ministrlar Sovetining 1962 yil 9 noyabrdagi 2045-r sonli qarori bilan klinika qurilishining xarajati smetasi tasdiqlangan. Klinikani qurish, zamon talablari darajasida jihozlash va bu bilan bog`liq boshqa murakkab masalalarni hal qilishga respublikada ko`zga ko`ringan sog`liqni saqlash tashkilotchilaridan biri, institut rektori, O`zbekistonda xizmat kursatgan fan arbobi, professor YU.O.Otabekov rahbarlik qildi.
       Qurilish 1966 yilda boshlanib, 1-bosqichi (1-blok) 1971 yilning dekabrida foydalanishga topshirildi. Inshootning qolgan 8 ta bloki bosqichma-bosqich qurilib, 1976 yilda nihoyasiga etkazildi. Qurilish ishlarini Andijondagi yirik 162 - qurilish trestiga qarashli viloyat qurilish boshqarmasi boshlig`i A.M.Mexalyants ishtirokida bajarildi. Klinika qurilishiga N.I.TSitsilin rahbarlik qilgan. 1977 yilda kuniga 250 bemorni qabul qilishga mo`ljallangan maslahat poliklinikasi ishga tushirildi. Institut rektori O`zbekistonda xizmat ko`rsatgan fan arbobi, professor R.M.Nurmuhammedov tashabbusi bilan 1985 yilda balneofizioterapiya bo`limi korpusi va 1987 yilda yiringli jarrohlik, proktologiya, endokrinologiya bo`limlari binosi ishga tushirilgan. 1998 yildan sog`likni saqlash tizimida kechayotgan islohot jarayoni, shoshilinch tibbiy yordam ilmiy markazi viloyat filiali tashkil etilishi, rejali restrukturizatsiya natijasida klinika faqat rejali bemorlarni davolashga ixtisoslashdi, bosqichma-bosqich o`z-o`zini moliyalashtirish respublika dasturiga kiritildi. 1987 yilda klinikaga haqli ravishda uning asoschisi YU.O.Otabekov nomi berilib, klinika hovlisiga uning byusti o`rnatildi. Hozirgi kunda klinika respublika darajasidagi ko`p tarmoqli ilmiy-amaliy o`quv - markazi bo`lib, Farg`ona vodiysi aholisiga jarrohlik, ichki kasalliklar, balneofizioterapiya, respublika aholisiga klinik limfologiya va vertebrologiya yo`nalishlari bo`yicha ixtisoslashtirilgan maslahat va statsionar xizmati ko`rsatib kelinmoqda.
       Klinika qurilishining birinchi bosqichi nihoyasiga etishi arafasidan boshlab bu yirik "Salomatlik koshonasi" ga mohir tashkilotchi, olijanob, mehnatsevar insonlar, shifokor-olimlar rahbarlik qildilar. A.H.Xo`jaqov (1971 - 1972), K.R.Mirzaev (1972 - 1975), A.I.Olimov (1975 - 1978), A.O.Otaxonov (1978 - 1982), Abdullajonov (1982 - 1993 va 1996 - 2004), A.Q.SHodmonov (1993 - 1996), V.Hakimov 2004 - 2005 yillar. 2005 yildan klinikani M.T. To`xtaboev boshqarmoqda. Ularning har biri klinika moddiy-texnika bazasini takomillashtirish, yuqori malakali, zamonaviy tibbiy hizmat ko`lamini yaxshilash, shifokor xodimlarning ish sharoitini yuksak darajaga ko`tarish, obodonchilik va ko`kalamzorlashtirish, mehnat intizomini mustahkamlash hamda jamoada sog`lom muhitni barpo etish ishlariga jiddiy yondashib ijobiy samaralarga erishganlar.
       YUqorida zikr etilgan yutuqlarning qo`lga kiritilishida bosh hakim o`rinbosarlari M.O.Otaxonov, M.N.Zuhriddinov, SH.R.Sobirov, N.A.Udachina, N.P.Parkaeva, M.X.Xolmatov, E.A.Xotamov va SH.U.Usmonovlarning hissalari beqiyosdir.
       Klinika tarkibiga 25 ta davolash, 16 ta yordamchi, 14 ta texnik xizmat bo`lim va bo`linmalari hamda maslahat poliklinikasi kiradi. 230 shifokor orasida 36 nafar tibbiyot fanlari doktori, 65 nafar tibbiyot fanlari nomzodi, dotsentlar bor. Jamoada 18,3 foiz oliy toifali, 39,5 foiz birinchi toifali, 13,5 foiz ikkinchi toifali, jami 759 nafar toifali mutaxassislar mehnat qiladi. Klinika institutning 15 ta kafedrasiga klinik baza hisoblanadi. Ushbu kafedralarning 21 nafar tibbiyot fanlari doktori, professor, 65 nafar tibbiyot fanlari nomzodi, dotsent, 35 nafar yuqori malakali assistentlari aholiga statsionar va maslahat xizmati ko`rsatmoqda. SHuningdek, klinikada Sog`liqni saqlash vazirligining klinik limfologiya (1988 y) hamda Vertebrologiya (2002 y) respublika ilmiy markazida faoliyat ko`rsatib kelmoqda. YUqori texnologik tekshiruv va muolajalar: yadro magnit rezonansli tomografiya, ultra tovush endoskopik, rentgenologik, laparoskopik amaliyotga tatbiq etilgan.
       Klinikada jami 1437 nafar xodim ishlaydi. Ulardan 230 nafari shifokor (3 fan doktori, 8 fan nomzodi, 100 ga yaqin oliy va 60 nafar 1- toifali) 480 o`rta tibbiyot xodimlaridir. Ular el sog`lig`ini saqlashda qiyin, shu bilan birga, sharafli vazifasini sidqidildan bajarib kelmoqdalar. Klinikaning gullab-yashnashi va ravnaqi yo`lida uning ilk davrlaridan boshlab xizmat qilib kelayotgan shifokorlardan rentgenolog- A.R.Egamberdiev va D.G.Abduvorisov, nevrolog Madaminov, jarroh X.F.Ishkazakov, reanimatolog S.X.Mamataliev, terapevt M.M.Qurbonova, otolaringolog - M.M.Mo`minov, poliklinika mudiri YO.B.Bulturboev va fizioterapevt T.J.Asronboevlar jamoaning faxridirlar.
       Klinika hududi Andijonning go`zal, ajib bir go`shasiga aylangan. Bu erdagi ulkan chinorlaru terakzorlar, kashtanlar, go`zal gulzoru favvoralar davolanuvchilarnigina emas, balki bu erga tashrif buyurgan mehmonlarni ham befarq qoldirmaydi.